Title:
Adriaan van Royen to Carl Linnaeus
Type:
Image
Licence:
Contact [email protected]
Repository:
The Linnean Society of London
Collection:
Linnaean Correspondence
Reference number:
LC/12/149
Archival level:
Item
Date:
28 February 1753
Placement:
Volume 12: 303-304
Extent:
303-304
Sender:
Royen, Adriaan van
Recipient:
Linnaeus, Carl
Transcription:
Viro Clarissimo, Doctissimo, Amico Integerrimo, D[omino] D[octori] Car[olo] Linnaeo, S[alutem] P[lurimam] D[icit] A[drianus] Van Royen. Missas praeterito vere cum seminibus litteras in tempore, spero, acceperis. Nos Tua Sibiricae, Canadensis, Chinensis Florae munuscula cum dulcissima Epistola sub Aprilis exitum laeti exosculati sumus. D[ominum] Kalmium de Re Herbaria optime merentem laudo, et meo nomine optime salvere jubeo reducem. Eriocephalus flores, quos in ramorum apicibus fert, candidissimos heri aperuit; at Characterem prae temporis penuria nondum recognovi; convenit, ut dein examinanti patuit, cum dato a Te charactere. Aloe Ex Vera Cruce, quae altero hic jam anno floret & fructificat, 20 pedum altitudinem emensa, et Americanae vulgaris instar ramosissima, nunc, insolenti prorsus spectaculo, e cicatricibus deciduorum fructuum (vel et juxta ex ramulis & pedunculis) innumeras undique novas plantas, quorum plurimae quoque florent, protrudit, dum simul omnes paene radices in totidem plantas florentes fatiscunt singulari mehercle nec prius audito luxuriantis naturae miraculo. Prionitis floruit 20 Octobris 1752, missa ex Promontorio Bonae Spei, cujus, mutilum licet, characterem, quoad observare licuit, promo. Cal. Perianth. monophyllum, erectum glabrum profundissime quadripartitum laciniis lanceolatis acuminatis, duabus oppositis latioribus longioribusque, persistens. Cor. monopetala ringens (lutea, inodora). Tubus longitudine calycis striatus collo coarctatus. Limbus quinquepartitus, laciniis lanceolatis, quarum duae superiores angustiores constituentes labium superius, duae laterales et infima latiores. Stam. Filamenta quatuor compressiuscula collo Tubi coarctati inserta, quorum duo longiora, duo brevissima. Antherae oblongae erectae, ad basin bifidae. Germen ovatum glabrum. Stylus subulatus erectus staminum longitudinem emensus declinatus. Stigma capitatum oblongum (purpureum). Defecit antequam reliqua observare dabatur. 10 Augusti 1752 Observatio nostra circa Boerhaaviam sic se habet. In eadem Planta, immo in eadem Umbellula flores diandros ac triandros observavi promiscue. Missa erat species ex Cap[ite] Bonae Spei; deinde ex capsulis undequaque glandulosis et, quoad distinguere potui, armato oculo ex ipsis glandulis recta eriguntur; hinc inde Fila capillaria unciam longa, quae marcescentia undulato flexu contorta propendent. Hinc specie diversa est a Boerhaavia diffusa. Linn. diciturque Boerhaavia floribus di- vel triandris, capsulis criniferis. Ex Beneplacito serenissimi Principis in Horto nostro Academico Gazophylacium erexerunt et instruxerunt Illustrissimi hujus Academiae Curatores splendissimum; ad quod velut agmine facto certatim advolant omnium regionum producta naturalia rarissima et pretiosissima sic ut non tantum Phytologia, sed & Ornithologia, Ichtyologia, Mineralogia et reliquae Historiae naturalis partes brevi doceri incipient in gratiam eorum, qui hisce deliciis capiuntur, et hanc Academiam frequentant. Si quid ergo rari novique habeat Suecia, symbolam confer, et grata etiam Tui inter tot Largitores liberalissimos memoria servabitur. Provocent autem Dona Tua qualiacunque levidensia haec, quae his inclusa mittimus, seminum munuscula, quae si non ingrata fuisse intellexero, toto laetabor animo! Nati mei dulcissimi abhorrent a Medicinae studio, quia Honos Medici Servitus est, quam in me experiuntur & pertimescunt; hinc in Botanicis, licet Floram ament, mihi succedent nunquam. Persuadere autem meos soleo, non cogere. Sed ex Fratre germano Nepos meae deinceps forte provinciae tuendae non inidoneus erit. Pro communicatis observationibus grates ago quam plurimas, sed plures, elaboratas & distinctas adde & ad me prescribe, cum in Flora Leydensi elaboranda occupatissimus sim, quantum turbulenta et molesta praxis permittit. Nihil magis me male habet, quam quod Acta Upsaliensia aliaque, quae apud Vos prodeunt, vix videre, multo minus quovis etiam pretio obtinere possim. Acta Upsaliensia Anni 1750 hactenus, quod doleo, ne quidem videre licuit. Omnium tamen oculi in Botanicis hodie in me conversi sunt, nec quicquam audent, nisi me suffragantem habeant; hinc cauto opus est, ne nimis liberales a recto aberremus tramite. D[ominus] Lidbeck gratus mihi fuit Hospes immo gratissimus; quod potui, in ipsum contuli beneficii, et commercium ab eo tempore cum Docto Viro inivi lubentissime & continuabo, quia meretur. Bulbus Liliaceus Vomitorius. Breyn. t. 40. Quae mihi Bulbine dicetur a nomine vacuo huic generi, jure legitimo, ut opinor, imponendo; floruit 1751 in Horto nostro & Inseretur post Lilium. Character ita se habet: Cal. nullus. Cor. monopet. sexfida; laciniis lanceolatis obtusis concavis infra medium erectis, supra medium patenti-reflexis (coloris intus albicantis extus viridantis. Stamen. Filamenta sex subulata petalo inserta corolla breviora. Antherae erectae bivalves, a basi versus apicem, quo cohaerent, dehiscentes (coloris purpurascentis). Pist. Germ. oblongum hexagonum seu sex sulcis striatum. Stylus cylindraceus, staminum longitudine. Stigma obtusum, trigonum, ciliatum vel glandulis potius pellucidis coronatum. Vid. Breyn. loco citato. Per. Capsula oblonga, sex sulcis exarata, trilocularis, trivalvis. Sem. plurima ovato-acuminata. Obs. Corolla peracta florescentia contrahitur, marcescit, persistit. Scapus biculbitalis nudus spica florifera terminatur. Radix squamosa purpurascit. Folia liliacea. Porro e seminibus ex Pro[montorio] Bon[ae] Spei missis enata est Liliacea. Novum Genus, quod post Asparagum locum concedam. Cyanellam dixi, quum et pusilla sit et flore amoenissimo caeruleo superbiat oculosque alliciat. Calyx nullus. Corolla Petala 6 unguibus cohaerentia, oblonga, acuta, concava, patentissima, superioribus tribus erectis, reliquis propendentibus. Stam. sex. Filamenta basi coalita (crocea) tribus superioribus et duobus mediis erecto-nutantibus tubulosis, infimo propendente vel declinato compressiusculo, duplo latiori. Antherae crenulatae (albae). Pist. germen trigonum obtusum; stylus fere longitudine staminis infimi, declinatus, filiformis. Stigma acutum, erectum. Peric. Capsula subrotunda (glabra), trisulca, trilocularis, trivalvis. Sem. plura oblonga. Obs. Qui florem dicit monopetalum ringentem, salvo jure possit. Rad. tuberosa. Folia radicalia lanceolata, striata, acuminata, integerrima. Caulina linearia. Caulis teres glaber divaricatus dichotomus constanter. 10 Augusti 1752 floruit Tournefortia difficilioris indaginis. 15 Julii 1752 floruit Nova Persicariae species mihi dicta Persicaria floribus octandris, trigynis; decies repetita observatione Cal. nullus, nisi corollam dicas calycem vel spatham membranaceam pro calyce sumas. Cor. quinquepartita, laciniis ovatis concavis, obtusis erectis (vel potius patentibus) alterne conniventibus, persistentibus. Stam. Filam. octo subulata, Antherae simplices erectae. Pist. Germ. subrotundum. Stylus trifidus; stig. tria globosa. Peric. nullum. Corolla sub calycis forma semen involvit. Sem. unicum ovatum compressum. Obs. stamen 1. intra singulas corollae lacinias. Tria reliqua stylum circumstant. Habitat in Madera & Jamaica. 15 Augusti 1752 floruit Jatropha foliis quinquepartitis, lobis ovatis integris, setis glanduliferis ramosis. Prodr. Leyd. 202. vid. Commel. Hort. 1. t. 9. Masculi Flores Cal. Perianth. monophyllum semiquinquefidum, laciniis lanceolatis ciliatis acutis. Cor. pentapetala rosacea, laciniis subrotundis, patentibus convexis, subtus concavis, hinc revolutis. Nectarium glandulae quinque parvae receptaculo affixae. Stam. Filamenta decem subulata in medio approximata, quinque alterna corolla breviora erecta; Antherae subrotundae versatiles. Pist. rudimentum debile in fundo floris latet. Feminei Flores in eadem Umbrella cum masculis. Calix & Corolla ut in mare. Pist. Germen subrotundum trisulcatum. Styli tres dichotomi. Stigmata simplicia. Peric. Capsula subrotunda tricocca trilocularis, loculis bivalvibus. Sem. solitaria subrotunda. Denique, nam si omnia, quae nova, ad Te perscriberem, plurium dierum aqua opus esset; floruit & fructicavit jam inde a triennio Alcea altissima foliis Papaijae ex Pensylvania. Napaeam tibi dici autumant, sed nusquam eam reperio in operibus Tuis, quae possideo. Characterem propterea meum habe! Cal. Per. simplex campanulatum monophyllum, semiquinquefidum laciniis triangularibus acutis. Persistens. Cor. Petala quinque integerrima apice latiora, basi angustiora connata. Stam. Filam. plurima inferne coalita in cylindrum, superne laxa, corollae inserta. Antherae reniformes. Pist. Germen orbiculatum. Stylus cylindraceus. Stigma simplex. Peric. capsulae articulatae in orbiculum subrotundum depressum discedentes, introrsum dehiscentes. Receptaculum columnare capsulas affigens. Sem. solitaria compressa reniformia. Ergo distinctum genus propter calycem & stigma simplex. Quod superset, enixe a Te peto, Amicorum dulcissime, ut mentem Tuam mihi aperire velis super generibus sequentibus. Quibus scilicet locis inserenda videantur in Flora nostra, quam elaborare omnibus viribus adnitor. Nimirum Cestrum Sideroxylum Ihonsonia Sophora Zanonia Rayania Gleditsia Dalechampia Meadea Cornutia Ceanothus Prinos Peplis Isopyrum Axyris Clethra Aretia. Matt. Poederota Collinsonia Hirtella Rumphia Polychemum Tillaea Catesbaea Budlaea Ixora Centunculus Ptelea Oldenlandia Trapa Dorstenia Hamamelis Diapensia Theophrasta Patagonula Spigelia Genipa Chomelia Rondeletia Itea Cupania Claytonia Thevetia Cerbera Rauwolfia Barreria Suriana Loranthus Richardia Medeola Grislea Lawsona Rhexia Santalum Moehringia Sapindus Spondias Toluifera Monotropa Neurada Clethra Melastoma Hydrangea Triopteris Bannisteria Drypis Cherleria Averrhoa Hugonia Penthorum Rizophora Gethyllis Sarcinia Sarracena Crateva Morizona Marcgravia Thea Vateria Mesua Mammea Chrysobalanus Plinia Sauvagaea Culligonum Tetracera Dillenia Orvala Cymbaria Lathraea Phalypaea Squamaria Gerardia Cherodendron Bontia Schwalbaea Craniolaria Ovieda Columnea Obularia Petraea Lippia Limosella Browallia Aeginetia Subularia Dalea Staehelina Pistia Zizania Theligonum Fevillaea Pisonia & si quae nova noveris alia. Panacis semina a Millero accepi. Medaeam Catesb. nondum vidi, sed videre gestio. Vale et me Tui studiosissimus esse persuasum habe, Iterum Vale! Dab[am] Leydae Batav[orum] ad d[iem] 28 Febr[uarii] 1753.
Previous reference number:
L1688
Condition note:
Small tear top edge 304.
