Title:
Adriaan van Royen to Carl Linnaeus
Type:
Image
Licence:
Contact [email protected]
Repository:
The Linnean Society of London
Collection:
Linnaean Correspondence
Reference number:
LC/12/146
Archival level:
Item
Date:
15 February 1750
Placement:
Volume 12: 298
Extent:
298
Sender:
Royen, Adriaan van
Recipient:
Linnaeus, Carl
Transcription:
Clarissimo Nobilissimoque Viro, Carolo Linnaeo, S[alutem] P[lurimam] D[icit] A[drianus] Van Royen. Litteras Tuas suavissimas, 24 Septembris anni proxime elapsi, ad me datas, accepi, et ut singularia erga me perennantis Amoris, Favoris et Honoris testimonia ac documenta habui, habeo et habebo, dum vivam, gratissimus, officiosissimus. Ultimas meas 15 Aug[usti] A[nn]i 1749 ad Te perscriptas quin acceperis nullus dubito. Observationes, quas circa Sidam nostram priorem & Abutilon Ehretii factas communicasti, placent. Editionem alteram prodromi nostri urget Typographus, verum plus otii recensioni dandum expostulat quam mihi jam per X septimanas, ex gravi & paene fatali morbo, valetudinario suppetit. Manum tamen operi admovi, cum publicae interesse videatur Rei Herbariae. Filius natu minimus Fratris germani, hujus Urbis nunc Syndici, nobis et omnibus Bonis flebilis, nuperrime occidit, et vicesimo aetatis anno diem vidit suum. Uxor mea et Nati laeti degunt et incolumes, nec Tui immemores. Quid Tua, quidve Tuus? Superatne et vescitur aura? Depositum Florae nobile, dulce Decus. Semina nec pauca nec vulgaria Tibi destinavi. Utinam prompte ut colligi, ita et queant expediri. Id enim multum facessit negotia. Saltem quum viam non noverim, qua quid transmittere possim, aliam quam per Gronovium nostrum, serius semper, quam par est, accipis id, quod ocyus exosculari desideras. Si remedium noveris huic malo, quaeso, indices, et habebis in tempore, quicquid petieris. Interim Vivas, Floreas, cum suavissima Tua Familia & me Tuos inter numerare pergas! Dab[am] Leydae Batavorum ad d[iem] 15 Febr[uarii] 1750.
Previous reference number:
L1113
