Title:
Adriaan van Royen to Carl Linnaeus
Type:
Image
Licence:
Contact [email protected]
Repository:
The Linnean Society of London
Collection:
Linnaean Correspondence
Reference number:
LC/12/150
Archival level:
Item
Date:
3 August 1753
Placement:
Volume 12: 305-306
Extent:
305-306
Sender:
Royen, Adriaan van
Recipient:
Linnaeus, Carl
Transcription:
Viro Clarissimo, D[omino] C[arolo] Linnaeo, Amico in paucis colendo Integerrimo, S[alutem] P[lurimam] D[icit] A[drianus] V[an] Royen. Tandem aliquando exoptatas diu ferias aestivas celebro. Utinam turbulenta Praxis haec otia non interturbet! Interim haec habe! Cyanellae characteri transmisso adde. Stam. 6 corolla duplo breviora; dein pro staminibus duobus mediis lege. Stam. duobus lateralibus; et sic bene se habebit totus character datus, quem ut ipse resumere queas, ramulum ejus florentem & fructificantem transmitto; dabo Iconem in Flora nostra. Non est Africana illa. Burm. t. 39. f. 2. Eamque nec alibi apud Burmannum nec Rudbeckium nec Plukenetium usquam offendi. Quid de Jatrophae floribus judicari debeat, ipse extrices ex ramulo florenti, quem mitto, mecumque, quid inveneris, communices in proximis. Florentem Jhonsoniam non vidi hactenus, sed folium vel ramulum his inclusum accipies. Jamaic. Persicariae floribus octandris trigynis. Ramulum florentem & Folium caulinum maximum his includo. Planta 4 vel 5 pedes alta, diffusa, ramosissima est et dichotomiae observantissima ex caulibus nodosis. His Boerhaaviae utraque species comes it, sed vereor, num in sicco specimine distingui queant organa mihi in recenti probe visa. Curabo semina. Nobis Tournefortia floret, sed nondum examini vacare potui. Mitto et Ramulum florentem Arbusculae Africanae 4 pedes altae, foliis sessilibus lanceolatis salviae aemulis &c. quam hactenus nusquam reperio. Cal. Perianth. monoph. semiquadrifidum minimum (subinde quinquefidum). Cor. Monopet. Tubus cylindricus calyce duplo triplove longior. Limbus quadrifidus (quinquefidus, sexfidus) villosus. Stam. 4. Tubi longitudine. Filam. filiformia. Antherae oblongae. Pist. Germen ovatum. Stylus simplex longitudine calycis. Stigma oblongum crassiusculum. Peric. Capsula ovata, unilocularis. Sem. plura, subrotunda. Tu reliqua supple, si possis, et quorsum pertineat, doce! Flores sunt terminatrices, sed an Paniculati an Corymbosi dicendi? Nova Passiflora mihi enata est valde singularis, sed nondum floruit. Caulis triangularis alatus. Folia ovata integerrima nervosa sulcata maxima. Petioli trianguli alati instructi glandulis sex (duabus semper oppositis in prona parte petioli) ovatis concavis seu potius urceolatis. Cirrhis longissimis inter Stipulas duas lanceolatas ex alis foliorum propendentibus. Ex Plantis, quas ex Pensylvania vivas accepi plurimas, prodiit floruitque dicta mihi Aristolochia foliis cordato-lanceolatis, caule erecto, pedunculis radicalibus unifloris. Est Aristolochia Pistolochia, s[ive] Serpentaria Virg. caule nodoso &c. Pluk. Alm. 50. Phytogr. t. 148. fig. 5. Alia eaque elegantissima planta, cujus siccum specimen examinandum mitto, flore albo spicato ex Pensylvania venit. Hujus characterem eruere non potui oculis deficientibus vel armatis. Bulbus Vomitorius Breynii exsiccatur, a blattis exesus est; reliquas mitto, sed quod vereor non sufficientes pro determinando subjecto. Aloe ex vera Cruce, quam pro octava specie in Horto Lugd[uni-]B[atavorum] demonstravit cl[arissimus] Boerhaavius, licet nomen plantae non congruat, est vera Agave propter corollas regulares, stamina corollis longiora, et germen floris receptaculo suppositum; hinc non de genere, sed de specie quaeri possit, num distincta sit necne. Si sit varietas Agaves foliis spinoso-dentatis mucronatisque hort. Ups., Illa profecto insignis erit. In Agave tua omnia, et praeprimis folia robusta crassa et turgidissima. In Nostra omnia concinnam et elegantem quondam habent teneritudinem; dein tota planta duplo vel triplo minor minusque robusta. Folia duos pedes longa ut plurimum in planta annosa & perfecta; quatuor vel sex pollices lata; prorus plana, sic ut crassities substantiae vix quartam pollicis partem excedat in medio folii, ad caudicem vero vix integri pollicis crassitiem habeat. Margines mollioribus crebrioribusque spinis armatis. Mucrones validi et atropumicei. Caulis floriger fructigerque 20 pedum Rhenoland. altitudinem exsuperat ramos spargens triginta plures, 12 vel 15 pollices longos, bis trichotomos. Non est Sobolifera Hermanni Lugdb. sed Polygona (ut mihi videtur) Commelini Rarior, quem consule, quum partes fructificationis optime decribat. Altitudinis enim & ramorum differentia speciem non mutant. Acta Upsal[iensia] A[nn]orum 1740, 1741, 1742, 1743 possideo; reliqua desidero; mittenda mercatori Stockholmiae in calce hujus significando. His adde precor sextum editionem systematis naturae, ut Napaeae characterem cum nostro conferre queam. Inprimis autem avidus expecto Primum Tomum Specierum Tuarum gratesque pro honore in eo mihi habito debitas persolvo. Randiafloruit hac aestate, sed flores brevi decidui fructum non maturant. Col. Perianth. monophyllum ovatum erectum, ore quinquedentato, persistens. Cor. monopetala hypocrateriformis rotata; Tubus cylindraceus calyce duplo longior. Limbus quinquefidus laciniis ovatis acutis. Stam. quinque. Filamenta nulla. Antherae oblongae intra Tubi faucem erectae. Pist. germen ovatum. Stylus simplex cylindraceus tubi longitudine superne bifidus. Stigmata obtusa inaequalia. Peric. capsula ovata, unilocularis. Sem. plurima, cartilaginea, compressa, pulpa cincta. An Hyacinthus peruvianus novam vel distinctam speciem constituunt? P.S. Quae mittenda habes, mittantur D[omin]o Johann[i] Wretman mercatori Stockholmiae, eidemque per litteras significetur, velit ea per mare expedire ad D[omin]um Van Royen Directeur van den Levantsen Handel Te Amsteldam. Per hunc enim, qui mihi germanus frater est, omnia, quae miseris, commode accipiam. Quas vero cumque dictus D[omin]us J[ohannes] Wretmar expensas fecerit, eidem D[omin]o Corn[elio] Van Royen eas assignare velit, rogo. Hic enim nummos erogatos lubenter & prompte persolvet. N.B. Librorum, qui mittuntur, pretium omnino indicari debet eidem D[omin]o J[ohanni] Wretman mercatori Stockholmiae. Spigeliae florem non habeo, alias mitterem lubens. Interim grates ago maximas pro generibus novis, suis classibus assignatis; reliqua autem, quam primum per otia tua licuerit, laetus exosculabor, ubi amicam Tuam Censuram subierint. Stirpium florentium sicca specimina ex Promont[orio] B[onae] Spei accepi plurima; 37 numero mittimus suis numeris notata Tibi mihique; ad numeros itaque, quae comperta habes, respondeas velim, si characteres extricare valeas. Sic enim et ego de hisce certior fiam in usus privatos et publicos. Vale meque ut soles amare perge! Dabam Leydae Batavorum 3 Aug[usti] 1753.
Previous reference number:
L1637
