Title:
Adriaan van Royen to Carl Linnaeus
Type:
Image
Licence:
Contact [email protected]
Repository:
The Linnean Society of London
Collection:
Linnaean Correspondence
Reference number:
LC/12/136
Archival level:
Item
Date:
16 March 1741
Placement:
Volume 12: 278-280
Extent:
278-280
Sender:
Royen, Adriaan van
Recipient:
Linnaeus, Carl
Transcription:
Viro Clarissimo, Carolo Linnaeo, M[edicinae] D[octori], S[alutem] P[lurimam] D[icit] Adrianus Van Royen. Litteras 7 Octobris 1740 ad Te datas, Burmanni Decades Plantarum Africanarum, Fasciculum seminibus refertum, ut et siccatas stirpes, num acceperis scire aveo. Ego Tuas accepi 15 Septembris 1740 exaratas. Pro his autem & communicatis observationibus grates ago debitas. Quam putabamus Eugeniam non viso flore, omni charactere, ut recte censes, est Euonymus foliis lanceolatis. Gron. flor. virg. 17. Balbosae quaedam ex Cap[ite] Bon[ae] Spei floruerunt, aliae flores protrudunt; Characteres earum & specimina alia oportunitate transmittam; jam vero de more mitto semina praeterita aestate collecta. Mense Majo proximo prelo committet Wishovius alteram Generum Tuorum Editionem, juxta Exemplar transmissum & conditiones annexas, hujus anni curriculo absolvendam. Cunctantem, propter Exemplaria superioris editionis nondum divendita retractantem, privata & publica auctoritate stimulare debui Wishovium. Tu vero quot ab eo Exemplaria desideres, in proximis mihi significes velim, et curabo ut habeas. Ursi Ego hoc negotium, quia Editionem illam emendatiorem citare debeo, id quod, puto, nec tibi displicere poterit. Moerhingius plurimas observationes mihi transmisit, & inprimis quidem in Characteres Tuos Illecebri, Hippuris, Salicorniae, Antherici, & Ruppiae. Has autem, tuos ut in usus convertas, sequentibus tecum communico. Verba ejus ita se habent. Ad haec genera quaedam Tecum communicare volui ad Systema Linnaei emendata, quae optimus ille minus intime investigasse visus est. Illecebrum. Linn. gen. 947. Cal. Perianth. pentaphyll. carnosum, foliolis crassis erectis compressis, introrsum excavatis ad summum fere, persistentibus, seta infirma terminatis. Cor. nulla. Stam. Filamenta 5 triangulari subulata fructu breviora, intra calycem. Antherae rotundulae, erectae, simplices. Pist. Germen ovato-acutum, calyce dimidio fere brevius, stylus nullus, stigma simplex turgidum obtusum. Peric. Capsula membranacea tenuissima, ovata, utrimque acuminata, simplex, univalvis, superne dehiscens, calyce tecta. Sem. unicum, ovatum, utrimque acutum, maximum, nitidum. Ergo in Linnaei Syst. sex. ad petandriam monogyniam pertinet, & forte post genus 94. achyranthis collocandum. Hippuris Linn. gen. 1. Cal. nullus. Cor. nulla. Stam. Filamentum unicum subulatum crassiusculum, deciduum, longitudine fere Antherarum germini insidens. Anthera didyma, quolibet segmento bisulcata a tergo, germine & filamento parum longior, crassa carnosa. Pist. Germen oblongum infra stamen. Stylus unicus filiformis, tenuis, erectus, acumine extrorsum reflexus, introrsum ad latus staminis ex apice germinis oriundus, stamine longior marcescens. Stigma acutissimum. Pericarp. nullum. Sem. unicum oblongum nudum, duriusculo tegmine abscondens nucleum parvum. Ergo margines illi a Linnaeo gen. 1. sub calyce descripti sunt verae antherae, nec aliud quidquam bona lente detegendum. Salicornia ramis clavatis, squamis articulorum adpressis. Fructificatio e flosculis tenuis, figuram trianguli birectanguli sphaerici, cujus basis sursum convexa est, repraesentantibus, alterno ordine sibi oppositis, constat. His fructificationibus triangularibus omnes clavae secundum longitudinem obsitae sunt. Insidet quaelibet commissurae ramulorum squamato-denticulatae subacutae denticulo instar receptaculi totius fructificationis serviente, ac infima stamina occludente. Cal. est productio scapi squamata, marcescens, quorum unum planum efficit. Flosculi superioris & quasi intermedii, rhomboidens, angulo inferiori rectilineo, acuto; angulo superiori curvilineo obtuso. Flosculorum duorum inferiorum, aut (si mavis) lateralium, trigonus, basi parum latiore. Cor. nulla. Stam. duo supra & infra germen, opposito situ ejusdem basi adfixa, & e vincula calicis prominula; superius primum exsurgit, quo delapso inferius prodit, unde factum est, ut omnes Botanici unum modo stamen ei adscripserint. Filamenta filiformia intra calycem abscondita. Antherae oblongae, erectae, extra calycem successive hiantes, didymae (unde fit ut primo subtiliori adspectu parvum corpus tetragonum prae se ferant) extrorsum concavae, lateribus introrsum longitudinaliter convolutis, cum filamento aequalis longitudinis, eidem in summo utrimque adhaerentes, arcteque illud obtegentes, basi sua plerumque intra foveolam calycis inclusae. In concavitatem istam multum farinae genitalis delabitur. Pist. Germen subrotundo-acuminatum, in medio filamentorum situm, intra calycem absconditum ejusdem cum filamentis longitudinis. Stylus nullus. Stigma capillare acutum. Peric. Capsula vesicaria, inflata, ovato-acuminata, exacte referens Calyptram Polytrichi Dill. 1. Sed deorsum magis ampullatum, intra calycem latens. Sem. ovato-compressum, unicum, a basi ad medium sulcatum, tenuissimi ope Pedicelli costae scapi adfixum, horizontaliter in capsula situm. Observatae fructificationis partes bona lente. Est & alia salicorniae species, quae ad salinas Germaniae crescit, mihi nondum satis examinata. Anthericum scapo foliolo, laxe spicato, filamentis villosis Linn. Fructificatio specifica. Flores in summitate scapi, 8 ad 16, raro 18, rarius 20. in spicam laxiusculam dispositi, e Pedunculis corolla duplo circiter longioribus, aut illi aequalibus, filiformibus, crassiusculis, scapo fere adpressis, erecto-parumper patulis, rufescentibus, egrediuntur. Cal. nullus. Corol. Petala sex lanceolato-linearia concava obtusa, prorsus uniformia patentissima persistentia; longitudine ¼ dig. Rhen. latitud. 1/12 dig. Rhen. intus citrea extus flavo-viridia. Stam. ¼ corolla breviora. Filamenta 6, ad basin petalorum enata adsurgentia subulata, circum circa villosa, 1/3 petalis breviora citrea. Villi capillacei breves, oblique adscendentes citrini. Antherae simplices oblongae compressae bisulcae cinnabarino-miniatae, primum erectae, mox extrorsum recurvae obtusae nucinatae, ac versus apicem coarctatae, longitudine ¼ filamentorum. Pist. Germen ovato-acuminatum, obtuse trigonum & sulcatum (hinc tandem sexangulare) erectum, simplex, longitudine filamentorum. Stylus nullus. Stigma minimum, obtusum, planiusculum. Peric. Exterius corolla marcescens, erecto-connivens. Interius & proprium. Capsula ovato-oblonga attenuata acuta erecta obtuse sexulcata, non nisi capsula perfecta sicca, apice trifariam dehiscens, 1/3 ad ½ corolla longior, glabra rufescens, interne tribus valvis, perpendicularibus praedita, trilocularis. Valvae hae infundibulum obtusum primaticum formant. Sem. in quolibet loculo numerosa, parva, oblonga, albida, capillari & tenuissimo filo setaceo, utrimque aeque longo, lacteo, prope insertionem in semen angulato, altitudinem capsulae attingente, praedita, in basim oculorum inserta. Obs. Differt haec planta ab Antherico Linn. gen. 303 & H. Cliff. 140, cui germina tria, totidemque styli ac stigmata, & capsulae; quum in nostra Germen, stigma, & Capsula unica, nullus vero stylus reperiatur, ut reliquas differentias, cuivis e collatione descriptionum manifestas, sileam; adeoque ad Bulbinem Linn. gen. 269 forte amandari debet, nisi & heic nimia partium fructificationis differentia obstare videatur. Bulbine enim petala decidua, antheras quadrisulcas, stylum persistentem manifestum, capsulam trisulcam &c. habet. Nostrae vero plantae petala marcescentia, antherae bisulcae &c. stylus nullus, capsula sexsulcata &c. sunt. Cui igitur generi adscribenda? An novum postulat? Sciagraphia Characteris generic: Cal. nullus Cor. Petala sex oblonga concava obtusa aequalia, patentissima persistentia. Stam. Marcescentia, corolla ¼ breviora. Filamenta sex subulata (villosa). Antherae perpendiculares compressae oblongae simplices bisulcae, mox extrorsum recurvae. Pist. Germen ovato-acuminatum, sexangulare, simplex, longitudine filamentorum. Stylus nullus. Stigma minimum subotusum. Peric. Exterius. Corolla marcescens connivens. Interius & proprium. Capsula ovato-oblonga, acuminata, obtuse hexagona, trilocularis; apice trifariam parum dehiscens. Sem. numerosa tenua oblonga, seta capillari acuta, utrimque aeque longa, ad insertionem in semen angulata. Ergo in Syst. sex. Linn. pertinet ad hexandriam monogyniam & forte post Bulbinem collocandum. Ruppia foliis linearibus obtusis. Planta aquis marinis innatans flexuosa perennis. Radix ramosa, fasciculos foliorum emittens; Corpus teres geniculatum repens, brunnum, solidum, crassitie pennae circiter columbinae aut parum tenuius. Fibrillae capillares simplices, e geniculis tantum prodentes, unciam unam alteramve longae, albicantes. Fasciculi caulini culmi graminei specie, singuli e singulis radicalibus ramulis egrediuntur, compressi, laxe geniculati glabri, valde infirmi, flexiles natantes, aquave marina refluente, argillae incumbentes, e quolibet geniculo vaginati alterno ordine ramos compositos emittentes. Folia vaginantia alterna linearia, verticaliter, obtusa, obtuse parallelogramma, glabra, mucosa, saturate viridia, basi geniculis caulinis infixa, ramulos cum horum foliis, narcissorum instar includunt. Versus extremitatem cujuslibet ramuli 2.3.4. folia situ parallelo, unicae vaginae includuntur. Omnibus fere foliis vaginitis, ipso caule longioribus, fructificationes ea quidem lege insunt, ut hae in dimidia inferiori ejus parte intra rimulam compressam absconduntur. Supra & infra fructificationis lineam geniculum transverse sulcatum est, hanc a petiolo infra, & a reliquo folio supra distinguens. Cal. Involucrum universale. Vagina, spathae vices supplens, in dimidia inferiori folii parte, introrsum rima media longitudinali, cujus latus unum ab altero aliquantum obtegitur, hians. Spadix intra involucrum membranacens, albidus, compressus, obtusus, lateribus longitudinaliter parum convolutis, medio leviter carinato, dorsum involucri spectans, longitudine ¾ involucri, aut parum longior, nunquam finem hujus adtingens, fructificationes 9 ad 13 distiche in longitudine obliqua forens. Cor. nulla. Filamenta nulla. Antherae solitariae ante florescentiam intra involucrum latentes, ovato-oblongae, utrimque subacutae, oblique adscendentes, et distiche secundum longitudinem spadici ita adhaerentes, ut nunc unam, nunc duas antheras unicum pistillum, eodem in plano, excipere videatur, singulis tamen antheris singula pistilla vere adsint, modo abscondita, modoque visui obvia. At explicatae (id est durante florescentia) ab alis suis lateralibus, elasticis, membranaceis, pellucidis, expansis, in figuram naviculae concavam incurvantur, carina deorsum prominente, et pistillis ita superimponuntur, ut distracta utrimque patulaque facta involucri rima, ima sui parte sursum horizontaliter adscendant, atque navicularum concavarum secundum longitudinem extrorsum pateant. Corpus antherarum flavum & mucosum est, quod facile abstergi potest. Pist. Germen intra involucrum oblongum; ad basin, qua spadici adfigitur, parum amplius. Stylus intra involucrum, simplex filiformis, sursum recurvus, persistens, post florescentiam cum spadice parallelus & parum curvus. Stigmat duo tenuissima capillaria, ab invicem diducta, extra involucrum horisontaliter exporrecta, cito marcescentia, et evanida (ut relicta hinc macula e ferrugineo nigricans facile alicui imponere possit. Stigma modo unicum est. Peric. Cortex tenuis membranaceus, cylindraceus, basi obtusus, apice stylo munitus, stylo parum longior, cum spadice parallelus, basi liber, ad finem styli spadici adfixus ope pedicelli brevissimi. Sem. in quolibet cortice solitarium cylindraceum utrimque obtusum, longitudinaliter subtilissime striatum, album. Ergo Pertinet in Linnaei syst. Sex. ad Gynandriam Monandriam, minime vero ad Gynandriam Polyandriam ejusd. ibid. In fragm meth. nat. Linn. p. 506. Class. Plant. pertinebit ad ordinem XLVIII quo & Najas & Zanichellia referendae videntur. In Royen. Syst. ad Palmas, spatha bifida. vid. Ejusd. Fl. Leyd. prodr. p. 9. Crescit in aqua marina ad insulam Wangeroogensem, & reliquas, ad sinum illum Oceani septentrionalis Wadt dictum, sitas insulas. Durante aquarum adfluxu eidem innatat, refluxu autem maris, argillae tenaci, cui radix infigitur, incumbit. Mirum, plantam adeo vulgarem locis maritimis, cujus folia (quae sicca per se nigra evadere solent, ast successive ab ardore radiorum solarium, papyri instar, alba plerumque fieri sueverunt) Mensibus Augusto & septembri a maris fluctibus ad littora abundanti copia rejiciuntur a nullo, quantum memini, nisi forte ab Anglo Botanico, descriptam aut depictam esse, Ruppiae generi inserenda videtur, si hujus character Linnaeo non nisi ad siccum exemplar, ut signum ?, in generibus plantarum adjectum, docet, examinatus, parum ampliatur. An malint alii novum genus? Tu, quaeso, haec dubia de Ruppiae & Antherici speciebus resolve, & significa, an nova genera expostulent, an vero alii, parum latius extenso generi ad normam Naturalis Methodi subjungi queant. Nolim interim, certiorem fieri Moehringium de observationibus his Tibi transmissis, sive recte sive secus observaverit. Vale et quantocyus possis, responde; nam forte quid in generibus hinc emendari vel moneri posset. Leydae ad d[iem] 16 martii 1741. P.S. An semina accepturus sis una cum hisce ignoro. Sed cum jam hae litterae ante duas septimanas conscriptae apud Cl[arissimum] Gronovium jacuerint, consultius duxi has statim ad Te expedire, quam longiores moras nectere. Iterum Vale! Leydae 1 Aprilis 1741. Heri obiit Cl[arissimus] Petrus Burmannus laudandus hic oratione funebri a Medico suo Cl[arissimo] Hermanno Oosterdyckschacht. Address Monsieur Monsieur Carolus Linnaeus Docteur en Medicine &c. a Stokholm
Previous reference number:
L0428
Condition note:
Sheet 280 is separate. Marks l.h.edge of text 279 recto, affecting 278 recto and verso and 279 verso. Seal tear. Seal present.
