Title:
Adriaan van Royen to Carl Linnaeus
Type:
Image
Licence:
Contact [email protected]
Repository:
The Linnean Society of London
Collection:
Linnaean Correspondence
Reference number:
LC/12/140
Archival level:
Item
Date:
28 February 1744
Placement:
Volume 12: 287
Extent:
287
Sender:
Royen, Adriaan van
Recipient:
Linnaeus, Carl
Transcription:
Viro Celeberrimo, D[omino] Carolo Linnaeo, S[alutem] P[lurimam] D[icit] Adrianus Van Royen. En, Amicorum Optime, semina quaedam superiori aestate lecta, hinc frugifera, et spes haud dubie, quas de iis concepi, expletura. Utinam accepta Tibi et grata venisse olim intelligere daretur; tunc enim dignum operae hujus tulissem pretium. Litteras 24 Augusti Anni proxime superioris, et 2 Januarii anni jam labentis ad me datas, una cum seminibus inclusis gratus laetusque accepi et exosculatus sum. Hinc quantum absit, quod vel iratus in Te vivam vel fidem Tuam toties mihi probatam ullo modo suspectam habeam, Ipse colligas; singularem enim animi Candorem, quem semper et ubique in Te laudavi, etiamnunc praedico, et in posterum, ut mereris, praedicare non desinam. Cum itaque me Tibi faventem et benevolentem habeas, non est, quod pristinam, qua nunquam excidisti, gratiam expetas. Profecto, quid causae subsit, cur doleas, ingenue fateor, prorsus ignoro; num quid ipse, qui suavior in litteris esse soleo, praeter morem fui morosior aliis forte negotiis distractus? At facti non sum conscius, alias veniam, uti do, ita et vicissim in perpetuam Amicitiae tesseram expeto. Hallerus, qui opus suum Botanicum jam ante annum ad Te expedivit, quaesivit in ultimis, quid ageres, cum nec responderis neque promissa exsolveris. Haec si vera, ne, quaeso, Virum bonum et eruditum negligas amplius, at forte jam interea temporis scripsisti, gratesque ipsi peregisti debitas. Sex enim et, quod excurrit, menses praeterlapsi sunt, quod nullas ab eo habuerim litteras. Missas aliasque plantas vivas mittam, si qua umquam sese offeret occasio vel per mecum peregrinantem vel per Mercatorem Amstelaedamensem, verum hanc viam difficilem invenio nec satis tutam. Urgebo tamen, quantum potero, ut Votis Tuis ac desideriis satisfiat. Ultra non valeo, Ultra, ut spero, a me non exigis. Pro communicata mecum observatione circa Asterem Cernuum &c. grates ago. Utinam et mihi perpetua fere praxi Clinica distracto aliqua fierent otia pro negotiis mere Botanicis! Sed vix horulae quaedam subsecivae supersunt, quibus hac in parte indulgere liceat. O fortunatos nimium, bona si sua norunt, Agricolas! Sententiam Tuam de Halleri methodo, Heisteri Dissertationibus &c. ambabus ulnis amplector, uti in litteris ad eos datis mentem meam explicans significavi et ostendi praeprimis posteriori, qui quamvis videat meliora, deteriora tamen sequitur, sed suo fruatur genio. Tu interim vivas floreasque diu sospes & incolumis, ut Reipublicae Botanicae ornamentum decusque existas immortale ac perpetuum. D[ominus] Gronovius, ut & Filius meus natu major, te plurimum salvere jubent. Vale & me Tuum esse persuasissimum habe! Dabam Leydae ad d[iem] 28 Febr[uarii] 1744. P.S. Ex Collegiis nostris diem suum vidit nuperrime Cl[arissimus] Oosterdyck Schacht Facultatis Medicae senior ejusdemque insigne decus et columen. Iterum Vale!
Previous reference number:
L0533
Condition note:
Stain centre r. verso.
