Title:
Adriaan van Royen to Carl Linnaeus
Type:
Image
Licence:
Contact [email protected]
Repository:
The Linnean Society of London
Collection:
Linnaean Correspondence
Reference number:
LC/12/147
Archival level:
Item
Date:
February 1751
Placement:
Volume 12: 299-300
Extent:
299-300
Sender:
Royen, Adriaan van
Recipient:
Linnaeus, Carl
Transcription:
Viro Clarissimo, Fama Meritisque Inclyto, D[omino] D[octori] Carolo Linnaeo, Professori Upsaliensi Dignissimo, S[alutem] P[lurimam] D[icit] A[drianus] V[an] Royen. Ex acceptissimis, quas nudius tertius aperui, literis non sine summo animi gaudio Te cum Tuis recte valere intelleximus itidem sanissimi. Ut autem, in quo desinis, exordiar, scias velim, Tres meos, quos mihi benigne superstites dedit propitium Numen, filios, ex quorum natu minimus, eo, quo gratissimas Tuas traderet literas, die, novum adimplebat annum, prosperrima frui valetudine, et uberrimos, favente Deo, polliceri ingenii fructus maturiori aetate in propria, ut spero, et publica olim commoda decerpendos. Sed quid Tuus agit, Amicorum dulcissime, Unicus quantum novi Blandulus, et Primogenitus Primi et Uniparae Filius suavissimus? An Apuum more floribus inhiat et mellito inde ore Tibi carissimaeque Conjugi dulcissima figit oscula nectareo rore madentia. Num vero currens in arundine longa ante pedes ludit agilisque tripudiat, an vero ad grandiora aptus natusque puerilibus annis Adspirat magnumque Patrem majoribus ausis Exsuperare Decusque Tuum firmare per omnes Seclorum series, propria sibi luce coruscans? O! ita sis felix, ita Te, qui cuncta gubernat, Diligat aeternum (sint rata vota) Deus! Epistolam Burckhardi ab Heistero cum praefatione et notis Epistolae subjectis editam haud dubie vidisti vel videre debes. Non enim Te, sed Burckhardum, Systematis Sexualis Auctorem statuit, id quod & mihi per litteras sub exitum superioris anni significavit rogavitque, ut meam ea super re ipsi aperirem sententiam. Epistolae meae responsoriae tenor hic erat: “Litteras Tuas ipsis Calendis Octobris ad me datas, doctisque muneribus auctas, accepi, gratesque pro iis solvo debitas. Placuit enim elegans Tua, quae eruditam Botanices historiam continet, Praefatio. Potuisset tamen, cum, quid de ea sentiam, requiras, ipse, minori cum partium studio, fatali illa omnibus scientiis ferrugine, concinnari. De primis Rerum Inventoribus, ut fuerunt olim, ita etiam nunc sunt, perpetuae ferme in quavis Arte ac Scientia Lites & Controversiae. Raro enim, qui primas, ut assolet, obscure pingit lineas, sed qui has ipsas jungit, ordinat, et in monimentum aere perennius aedificat, Auctor atque Inventor habetur praedicaturque. Id quod si medica, anatomica, chirurgica Inventa perlustrare animoque advortere quis voluerit, ultro lubensque fatebitur. Equidem Cl[arissimi] Linnaei patrocinium in me nec suscipio, nec suscipere debeo, quum adversariorum tela Ipse satis retundere valeat. Verum tamen Bene meritos, etiamsi forte humani quid passi sint, publice traduci, vulgique ludibrio exponi, vehementer doleo, utpote vel tectos Urticarum aculeos exosus. Quotus enim quisque est, qui non quandoque cum bono dormitat Homero? Ut vitiis sane, ita et erroribus patemus omnes, beatus ille qui premitur minimis! Sit ergo sua Jungiis, Camerariis, Burkhardis, omnibus denique Germanis, sed et sit sua Linnaeis, Boerhaviis aliisque bene merentibus gloria, etiamsi Alter in Alterius laudes quavis pagina non exspatiatus fuerit. Verum, ut haec missa faciam, nec ego, qui tamen aptas Camerarii icones laudavi, nec ceteri ejusdem subsellii Botanici, Camerarium, nuperrime Tibi cognitum, nominavimus. Heu facinus invisum et insolens, Heu turpissimum et multo colore tegendum flagitium, quod vel ideo non tantum in Praefatione, sed et Indice eum in finem locupletissimo atro carbone notari meruerat! Quo itaque Tu, Vir Celeberrime, me nominaveris animo, ipse nosti, et emunctis naribus ipse subolfacio; scias tamen velim, risum potius, quam bilem, inde moveri. Ego saltem, in quantum res agitur mea, quare ad haec respondeam, habeo, et propria Tua, Vir Clarissime, in Te arma hic retorquere valeo, sed nec vacat hodie nec lubet, quippe qui aliis longe moribus natus sim et ad vindictam tardissimus. Saltem tantum abest, si me bene novi, quod alterius meritis quidquam detrahere aut alienis plumis superbire satagam, ut potius, mihi debitam, si quam merui, Lauream, alterius fronti imprimere velim. Sed verborum satis, et ut constet, quod sic soleam Amicos, en, quae desiderasti a nobis semina, quorum si nonnulla placuerint, solidum grata mente gaudebo gaudium, animusque in Te, Vir Celeberrime, et omnes Bonos propensissimus exultabit. Vale et, quem mereor, honorem, favorem, amorem in me conferre ne dedignare &c.” Novi utilissimique Inventi, quod me participem reddere volueris, gratus agnosco. Utinam vera Ejus et Experimentorum serie probata fides! Symbolam meam, spondeo, istuc conferam, ut in justam poenam datis mortalium aerumnis occurram. Sed proh dolor tardissimus et negligens in colligendis perennium plantarum seminibus Hortulanus noster nulla nobilis hujus Loboeliae semina legit, quapropter modo non perierit mater; ipse foetus legam proxima aestate, et quantocyus Te eorum participem reddam, nisi prius ipse eadem a D[omino] Kalmio reduce acceperis. Centum tamen circiter plantarum non vulgarium semina vel his includam vel alia via hoc ipso mense expediam. Utinam in tempore Lares Tuos inveniant feliciter! Pro dissertationibus varii argumenti, quarum & participem feci Cl[arissimum] nostrum Gronovium, grates persolvo debitas. Prodromi nostri Editionem alteram urget Bibliopola, sed tot tantaeque in ea castiganda et emendanda difficultates occurrunt, ut moram non injiciant levem. Species enim, si non et genera, longe plures constituendae erunt, id quod aliunde occupatissimo non parum facessit negotii. Ericetum fere exaruit, & quando proditurum sit, vix hallucinando assequor, cum quoties opus istud adgredior, inde abstrahor & pluribus domesticis negotiis, in dies aliis atque aliis, obruor. Atqui hoc secessum scribentis & otia quaerit. Accedunt causarum patroni et Haeredes non scripti, quibuscum & Hagae Comitum & alibi lites pendentes habeo. Quod quidem negotii molestissimi genus quam sit alienum a nostro ingenio probe, ni fallor, nosti. Di meliora &c. ! Vale, fave solitoque amore me complecti perge! Dabam Leydae Batavorum ad d[iem] Febr[uarii] 1751. Address Monsieur Monsieur Carolus Linnaeus Professeur dans la Medicine dans la Botanique &c. &c. a Upsal
Previous reference number:
L1232
Condition note:
Small seal tear. Seal present in 3 pieces, plus 3 blobs of wax
